flytande vending

•

I utstillinga flytande vending utforskar grafikar Åse Vikse (f. 1981, Sveio) spenninga mellom det konstruerte, handfaste og det flytande. Vatnet, som flyt nær arkitekt Ole Vangberg sine ti kyrkjebygg, fungerer som ein metafor for det livgjevande og det forgjengelege. Samstundes deler det eigenskapar med grafikken, ved at det speglar omgjevnadane sine. Dette leier oss attende til kulturkyrkja, og spørsmålet om ho skil seg frå dei andre ni ved i større grad å spegla omgjevnadane.

Utstillinga undersøkjer korleis kulturkyrkja har utvikla seg frå ein tradisjonell religiøs institusjon til ein meir inkluderande arena for kunst, kultur og tru. Tittelen speglar tresnittet sitt vesen – der motivet alltid vert vendt i møte med papiret – men peikar òg mot vatnet som eit elementært bindeledd i Vangbergs arkitektur. Gjennom sitt arbeid med grafikken ser Vikse på kulturkyrkja både som konstruksjon og institusjon. Ho ser på utsmykking, dekor og himmelretning gjennom det alle må passere for å koma inn i det heilage: inngangspartiet.
Mange vil sjå på desse einsarta, kvite trekyrkjene som den typiske kyrkjebygningen i Noreg; ei homogen gruppe som symboliserer både gjenkjenning i landskapet og ei kjensle av det kjende. Vikse vel å sjå nærare på det særskilde ved kyrkjene, dét som er deira eige og gjer kvar einskild til eit unikum.

I flytande vending tek verka utgangspunkt i det umiddelbare og upolerte, der sjølve materialet vert ein vitneberar. Ved å nytta treemne funne i Sveio som trykkplater, vert historie, landskap og materiala sine stille soger foreina og overførte til papir. Slik vert grafikken eit avtrykk av omgjevnadane, og vitnar om gjensyn og stadkjensle.

Åse Vikse er ein tverrfagleg grafikar frå Sveio, busett i Øystese. Ho har MA i Fine Art (Printmaking)
frå Middlesex University, London, og BA (Hons) i Communication Design frå Gray’s School of Art, Aberdeen.